Apirilak 19 - Iruñerriko Manifestazioaren klipa

Gazte 1 + EZ! Eguna Burlatan 30ean

"Gazte1+ez! eguna" prestatzen ari dira Iruñerriko gazte auzipetu ezberdinak,“datozkigun epaiketa eta prozesamenduei aurre egiteko, baina aldi berean, gazteria mugituaren bizitasun eta dinamika agerrarazteko”. Hitzordua Burlatan izanen da apirilaren 30ean. “Elkarrekin erakutsi dezagun atxiloketa, prozesamendu zein epaiketak etorriko badira ere, lanean segituko dugula”, adierazi dute gazteek.

Hau da egunerako prestatu duten egitaraua:

14.00   Trikipoteoa

14.30   Bertso BAZKARIA

17.30   "Lib Dub" grabaketa: Etorri eta parte hartu!!!

19.00   MANIFESTAZIOA Askas plazatik.

“Azken urteetako gazteon kontrako errepresioa ez da makala izan”, esan dute. “Bereziki 2007ko urtarrilean Auzitegi Gorenak Jarrai-Haika-Segi gazte antolakundeak terrorista izendatu zituenez geroztik 214 gazte izan dira atxilotuak eta 132 espetxeratuak Euskal Herri osoan, intoxikazio mediatiko izugarriez lagunduta joan diren operazioeran”.

Guzti honek Iruñerrian izandako eragina itzela da.“2007tik hona, 79 gazte izan baikara atxilotuak; Hoietatik 46 torturatuak eta 51 espetxeratuak. 114 gazte gara Iruñerrian auzi ezberdinetan prozesatuak. Hamarnaka, jo puntuan jartzen dituen zerrenda beltzen parte gara edota astero zein hamabostean behin siñatzera joan behar dugunok”. 

Gainera, ez zaie kasualitatea iruditzen Euskal Herrian emandako gazteen kontrako jazarpena. “Non eta, historikoki aktiboa izan den euskal gazte mugimenduan; Noiz eta, sistema kapitalista minduta dagoenean eta Euskal Herrian aldaketa politiko integralerako jauzia herriak egin duenean”.

Alta, ez daudela honetarako prest esan dute, ezta haien jarduera politikoa isiltzeko prest. “Guk, herri hau aldatu nahi dugu. Utopikoak izanen gara agian, baina eskubide osoa dugu mundua ezberdin amesteko, aldarrikatzeko edota eraikitzeko”, gaineratu dute.

Iruñerriko gazteen aurkako errepresioaren inguruko dossierra

Open publication - Free publishing - More errepresioa

Ekintza ugari aste bukaera honetan!

-Ostiralean (22) MATXINSALTO Eguna Soraluzen!!!

Biharko egunez euskal ikasleok zita bat dugu iraultzarekin! Iritsi da garaia gazteok elkarlanean geldiezina izango den uholdea sortzeko. Baina horretarako ezinbestekoa dugu sistema iraultzeko behar ditugun tresnak ikasi eta irakastea.

Goiz goizetik tailerrak izango ditugu, arlo ezberdinetan banatuta; Komunikazioa, Kultura, Hezkuntza, Nekazaritza, Harremanak, Sozio-ekonomia eta Aisialdia. Arlo bakoitzean bizi ditugun zapalkuntzak identifikatuta, hauek iraultzeko egin behar dugunaz hausnartuko dugu, esperientziak konpartitu eta ikasi. Gerora guzti hau gure borroka eremuetan martxan jar dezagun. Bazkari herrikoiaren ostean izango da zer dantza, salto eta ikasi ere, herrian zehar antolatutako gune ezberdinetan. Gauean berriz iraultak aurrera jarraituko du musikarekin batera. Informazio gehaigo Matxinsaltoren orrian duzu eskura!

Guzti hau eta beste hainbeste sorpresa izango ditugu bihar Soraluzen. Zu etxean geratuko al zara? Egin salto eta zatoz gurekin Matxinsaltora!

-Igandean (24) ABERRI Eguna Gernikan eta Baigorrin!!!

Independentista Sareak eginiko deialdiarekin bat eginez, datorren igandean, apirilak 24, euskal ikasleriari Aberri Egunera bertaratzeko dei egiten diogu. Aurtengoan, Aberri Eguna Euskal Herriko bi puntutan deitu du Independentisten Sareak, Gernikan eta Baigorrin. Izan ere, egun berean dira Nafarroaren Eguna eta Aberri Eguna eta, honenbestez, izugarrizko aukera ederra bilakatu dira bi deialdi hauek gure naziotasuna aldarrikatzeko eta Nafarroak izan duen eta duen erreferentzia aldarrikatzeko.


Honela bada, bi lekutan ospatuko bada ere Aberri Eguna, goizeko 12’00 abiatuko den martxa eta ondorengo ekitaldiak aldarrikapen berdinaren baitan joango dira lotuta: ARGI BERDEA INDEPENDENTZIARI!

Arratsalderako ordea, bakoitzak bere egitaraua osatu du. Baigorrin, Nafarroaren Egunaren baitan  prestaturiko ekimenak mantenduko dira, nahiz eta aurreko urteekin alderatuz, animazio eta kontzertu gehiago izango direla iragarri duten. Gernikan berriz, 14’00tatik aurrera kale animazioa, txosnak, bokatak, batukadak… izango dira pasealekuan. Kantuki taldearen erromeriaren ostean gazteon ekitaldia izango da. Gauean berriz kontzertuak, Des-kontrol eta Obrint Pas-en eskutk.

Zorionak berriz Iruñerriako ikasle!

UPNren Inposaketen aurrean ixilik geldituko ez garela eta Hezkuntza Sistema Nazionala eraikitzeko beharra daukagula erakutsi genuen!!!

Mobilizazioaren Balorazioa:

Oztopoak oztopo, iruñerriko ikasleak 19an kalera atera gara. Ehunka ikasle bildu gara, gaur goizeko Manifestazioan nahiz eta hainbat ikastetxeetako Zuzendariek Greba egiteko baimenik ez eman, Biurdana, Berriozar eta Paz de Ziganda kasu. Manifestazioa jendetsua izan da nahiz eta Azaroak 17koa baino jende gutxiago bildu izan duen. Iruñerriko ikasle abertzaleaketik, jardunaldia positibotzat hartu dugu, nahiz eta esan bezala oztopoak ugariak izan lortu dugu gaurkoan ikasle uholdea kalera ateratzea.

Inzidenterik ez dira suertatu, nahiz eta egun osoan ikastetxe inguruetan eta Manifestazioan kolore guztietako Polizia izan. Hezkuntza delegaritzara sinadurak ematera sartu diren 2 ikasleak, identifikatuak izan dira Nafarroako Polizia foralarengatik, gainera barruan egon diren une orotan eskoltatuak izan dira.

Bukatzeko esan, gaurkoa ikasturteko aktibitate handiko askeneko txanpa izan dela, baina hasiera besterik ez dela izan beste hezkuntza eredu baten alde. Oraindik askeneko mobilizazio eguna geratzen zaigu Iruñerriko eta Nafarroako ikasleoi Maiatzaren 7an Burutuko den Iruñerriko ikasle eguna.

Irakurketa:

Mila esker gerturatu zareten ikasle guztiei. Gaurko eguna, 2011ko Apirilaren 19a, Iruñerriko zein Nafarroako ikasleontzat egun erreferente gisa hartuko da. Egun honetan ikasleon eskubideak bermatuko dituen beste eskola eredu baten aldeko bideari ekin diogu. Orain arte aurrera eramandako borroka guztiei esker ez dira gutxi izan lortutako garaipenak: Intsumisioaren borroka, Boloniaren aukako borroka edo Foru Dekretuan emaniko aldaketa txikiak, adibidez.

Ikasturte hasieratik hainbat borroka burutu ditugu Alberto Catalánen eta UPN-ren hezkuntza politiken aurka; Foru Dekretuaren aurkako mobilizazioak, Iruñerriko mendi martxa, Azaroaren 17ko mobilizazioak, Ikasle Presoen aldeko eguna, Ihauteriak… Gaur eta hemen bertan, salaketa eta mobilizazio haietan jasotako indarrari jarraiki gure alternatiba aurkeztera gatoz. Orain arteko hezkuntza eredu eta politikak gure etorkizuna arriskuan jartzen du eta ez gaude hau onartzeko prest. Horregatik, etorkizun duin batean sinisten dugulako, geurea den eredu bat eraikitzeari ekingo diogu.

Gaur Alberto Cataláni azken egunetan bildutako sinadurak entregatuko dizkiogu. Bertan  gure proiektuaren hasierako eta oinarrizko baldintzak markatu eta hauek betetzea exijitzen diogu; Eskola eta Unibertsitate euskaldun baten eraikuntzari ekitea, ikasleen eskubideak bermatu eta ikasleak subjektu aktibo gisa jardutea ahalbidetuko duten neurriak hartzea eta Euskal Eskola Nazionalerantz aurrera pausoak ematea.

Ez gara hitzetan bakarrik geratuko ordea. Ikastetxe eta unibertsitatean ikasleon aldarrikapenak betetzen bidean lanean jarrituko dugu. Ikasle borrokaz lortuko dugulako!

Gora ikasle mugimendua!

Gora Hezkuntza Sistema Nazionala!

Gora Ikasle Abertzaleak!

Iruñerriako Ikasle Abertzaleak

Manifestazioko argazki gehiago ikusteko hemen klikatu

Mai-7 Iruñerriako Ikasle Egunerako Urratu taldearen abestia!!!

Matxinsalto eguna Soraluzen!

Oharra: 

Milurte berriko lehen hamarraldian gazteriak aldaketa bortitzak bizi izan ditu. Neoliberalismoaren ofentsiba basatiak buldozerrak lurra bezala bultzatu gaitu alfonbra urdinean barrena. Merkatuaren hatz erakusleak gazteok markatu gaitu. Kontsumorako gailu zoragarriak begi bistaratuz, gure burmuinak seduzitu dituzte, guk nahi genuena, guk behar genuena hori zela sinestarazi nahian. Hori izan da saldu diguten askatasuna: marka hau ala bestea, iraungitze data duen zoriontasun dosiarekin, “por que yo lo valgo”. Indibidualismoan eta ghetto izaeran sakonduz gazteok kaleko bizitzatik atera eta asteburuak merkatal zentro erraldoietan sartuta pasatzeko gonbitea onartu dugu ia pijama eta zapatilak ere eramateraino gure poltsikoan. Kaletik atera eta taberna edo lokaletan sartzeko gonbida onartu dugu hori baita askatasuna: helduek zer egiten dugun ikusi gabe nahi duguna egitea. Kaletik atera eta pantaila eraiki digute parean sare birtualak osatzeko gonbita onartuz. Eta deitu, zenbatu, gehitu.

Guzti honek aldaketa nabarmenak eragin ditu gazteon artean. Gazte problematikaren topografia konplexua paper txuri garbi bilakatu nahi izan dute, gazteon kontzientzia kolektiboa borragomarekin ezabatuz, gure berezko izaera errebelde, kritiko eta inkonformista bideojokoetako jokoetara mugatuz. Game over? Ez.

Iaz Zestoan gazte mugimenduak burutu genituen topaketetan argi geratu zen gazteok oraindik baditugula ametsak eta egungo status quoa aldatzeko gogoa. Lehen aipatutako aldaketa guzti horiek arriskuekin batera aukerak ere ekarri baitituzte. Elkarlanean jardunda egungo sistema kapitalista patriarkala iraultzeko gai garela ikusi genuen.

Azken hilabeteetan, ostera, gazteriak herriz herri diagnostikoak burutu ditu gazteon kezka eta beharrizanak identifikatzeko asmoz.

Sistema kapitalista patriarkarra bestelako aurpegia erakusten saiatu arren, argi daukagu hau ez dela guk nahi dugun bizi eredua eta herri eredua. Gazteok bizi ditugun arazoak berriz ere mahai gainean jarri eta kolektibo gisa erantzun nahi diegu hauei. Gazteok beti joan izan gara bi pauso aurretik, guztia zalantzan jarriz eta gure alternatibak planteatuz. “Bizitza… baina nola bizi?” Egunerokoan ditugun kontraesanez jabetu eta hauek gainditzen saiatu behar gara, norbanakoak hartutako jarrerak kolektibo osoari eraginez. “Borroka nire baitan hasten da, aska ditzagun geure buruak!” Hala zioen Negu Gorriak taldeak. Horra hor erronka.

Kolpeka kolpeka apurtzen da izotza eta gu mailua hartzeko prest gaude, ez pitzatzeko bakarrik, baita eraikitzeko ere.

Apirilaren 22an gure matxinadarako ditugun tresnak ikusi eta esperientziak trukatzeko asmoz gazte mugimenduak Matxinsalto eguna antolatu du. Praktikara begira eremuz eremu iraultzarako ditugun tresnak ikusi ahal izango ditugu: kultura, komunikazioa, aisialdia, hezkuntza, sozioekonomia, nekazaritza eta, harreman ereduak eta sexualitatea.

Gure ordua heldu da, txo! Iraultza gure baitan hasten da! Egin ezazu behar duzuna!

Apirilaren 19an Greba Iruñerrian!!!

Euskararen garapena ekiditea helburu duen TIL ereduaren ezarpena eta Vascuence-ren legearen sustapena, orain 20 urte eratu zenetik indarrean dirauena; Foru dekretua, Ikasleen eskubide guztiak zuzendariaren esku utzita ikasleon ahotsa isilarazi nahi duten neurriak; Euskal Herria aintzat hartzen ez duten testu liburuak, Curriculum arrotzak oinarri dituztenak; ikasleon gaineko kontrola, gaizkiletzat hartzen gaituzte, polizia ikastetxe inguruetan noiznahi aurkituz; eta azkenik, lan munduan barneratzeko zailtasunak, jakina baita ikasleok eta gazteok krisi egoera honetan pairatzen ari garen egoera prekarioa dela eta ezinegona nabaria dela, gazteen %40a langabezian baitago.

Egoera honen aurrean, esan bezala, ikasleak ez gara besoak gurutzaturik geratu. Mobilizazioa hasi da jadanik, Manifestu bat kaleratu dugu (hemen klikatuz osorik irakur dezakezue) eta datozen asteetan horren sozializazioari ekingo diogu. Apirilaren 19ra arte luzatuko den sinadura bilketa abiatu dugu eta amaiera gisa Mobilizazio eguna deitu dugu 19a. Honela, 13:00etan Autobus geltoki berritik abiatuko den manifestazioan parte hartzeko dei egiten diogu ikasleriari. Mobilizazioekin jarraituz, Maiatzaren 7an Iruñerriko Ikasle Eguna egingo dugula ere adierazi dugu.

                       

Agerraldiaren audioa entzuteko hemen klikatu

Agerraldiaren irakurketa: 

Azkeneko denboraldian pairatutako zapalkuntza sistematikoa eta nafar gobernuak hartutako hezkuntza neurriak salatzeko gerturatu gara gaur, hemen gauden ikasle guztiak.

Esan bezala, Nafar gobernuak ikasleon aurkako erasoak etengabe bermatzen ari ditu, berriki ikusi dugun bezala “ikasleon eskubide ta betebeharren dekretuarekin” edota Euskal Herria aintzat hartzen duten hainbat editorialei diru laguntzen ukapenekin. Eraso hauek, azken aldian egindakoak izan dira baina duela urte askotatik pairatzen ditugun zapalkuntzak bermatzen jarraitu dute.Adb: Vascuenceren legea, Curricilum arrotzak edota Euskal Herriaren banaketa administratiboa . Gainera Eskola eredu arrotz berri baten eraikuntzari ekin diote, TIL izenaz ezaguna.

Eraso guzti hauei Nafar gobernuak ez die inolako irtenbiderik eman, alderantziz, indartu egin ditu. Ikasleok, hezkuntzaren sudjeto aktibo izan nahi dugun heinean, arazo guzti hauei irtenbide bat bilatzea ezinbestekotzat jotzen dugu.

Hau dela eta gaurkoan oinarrizko Hezkuntza manifestua aurkezten dizuegu “Hezkuntza eredua erabakiz, etorkizuna eraiki” deitua. Manifestu honetan, aurretik aipatutako erasoei aurre egiteko eta beste eskola eredu baten eraikuntzari ekiteko oinarriak azaltzen dira. Hiru atal nagusitan banatzen da:

Lenengo atala, Eskola eta unibertsitate euskaldun (edukiz eta hizkuntzaz) eta herritar baten eraikuntzari ekiteko oinarrizko baldintzak jartzen ditu.

Bigarren atalean, Ikasleon eskubide guztiak errespetatu eta ikasleok hezkuntzaren subjektu aktibo gisa jarduteko ezinbestekoak diren neurriak garatzen ditu.

Hirugarren eta azkeneko atalean, Euskal Eskola Nazionalaren eraikuntzan aurrera pausoak emateko lehenengo egin beharrak kokatzen ditu.

Ikasle ta Abertzaleok beste eskola eredu batean sinesten dugulako, bihartik aurrera epe motzean eta ertainean hainbat ekimen burutuko ditugu, Manifestu honen indartze prozesuari begira, horien artean sinadura bilketa orokorra, ikasle guztien artean, eta Iruñerriko Ikasle Eguna Maiatzak 7an.

Sinadura bilketa eta eragileen atxikimendua gaurtik apirilaren19rarte izango da. Bukatzeko, 19an bertan Mobilizazio eguna egiteko deialdia luzatzen diegu ikasle orori, 13:00etan Autobus geltoki berritik hasiko den Manifestazioan parte hartu eta manifestuari bere sinaduren bitartez babesa ematera animatuz. Manifestazio honen bukaeran Alberto Cátalani sinadurak emango zaizkio, bere hezkuntza politikekin bukatzeko ta beste eredu baten eraikuntzan hasteko.

Bukatzeko deialdia luzatu nahiko genieke Hezkuntza eremuko eragile eta estamentuei, bai apirilaren 19ko mobilizazio egunean parte hartuz edota bere babesa emanez manifestuari.

Gure hezkuntza sistema erabakiz, gure etorkizuna eraiki.

PD: Zuen ikastetxetan, greba egin nahi baduzue bitartekoak gu bidaliko dizkizuegu. Mezu bat bidali komentarioz ta bidaliko dizuegu Zuzendaritzarako eskakizuna, manifestua, eskuorriak, autadillak, badauden bitarteko guztiak.

http://www.ikasleabertzaleak.org/2011/04/08/apirilaren-19an-mobilizazio-eguna-irunerrian/#more-1252

Hezkuntza zapaltzailerik ez! Ikasleok Hezkidetza!

Martxoak 8, Emakume Langileen Nazioarteko eguna da. Egun hau erreferente gisa dugu borrokarako emakume eta gizon guztientzat. Hori dela eta ikasle feministok hezkuntza parekide eta duin baten aldarrikapena egin nahi dugu egun berezi honetan.
Iruñeako auzoetan kontzentrazioak egingo dira. Animatu eta parte hartu!!
Txantrean Eunateko TAlde Feminista auzoko beste Talde Feministarekin elkartuko da 19.00tan Euskara Plazan.
19.45etan ikastetxe guztiak bilduko gara Merkaderes Plazan. Hitz egin zuen ikastetxeko jendearekin eta etor zaitezte! 20:00etan manifestazio handia egongo da Gaztelu enparantzan!
AGER ZAITEZ!!

Ikasle Abertzaleon oharra:
Egungo gizarte ereduan emakume eta gizonen arteko bereizketa nabarmena da, hain zuzen ere, sistema patriarkatuak berak, hala egiten duelako. Hau horrela izan dadin ordea, birproduzitu eta mantendu dadin, hezkuntzak paper garrantzitsua jokatzen du. Sistemak badaki eta horregatik, ikastetxe naiz unibertsitatean aurkitzen ditugun ereduak, bere interesetara moldatzen ditu. Modu honetan, pertsonaren beraren heziketa gauzatu beharrean, rolen baitako heziketa da euskal ikasleok jasotzen duguna, ezarritako estereotipo eta emakume/gizon bereizketan sakonduz.
Ikasle Abertzaleok ez dugu eredu honekin bat egiten. Guk geuk eraikiko dugun Euskal Eskola Nazionala parekidea eta hezkidetzailea izan behar duela uste eta nahi dugulako, hots, genero eta aukera sexual eta abarretatik eratorritako bereizkeriak gainditu eta pertsonak hezten dituen eskola bat. Modu honetan, gizarte parekide baten partaide izango diren herritarrak heziz.
Euskal ikasleok besteko gizarte eredu bat nahi dugu eta hori lortzeko hezkuntza hezkidetzaile baten beharra ikusten dugu. Horregatik, ezinbesteko borroka gisa ulertzen dugu, egungo ikastetxe eta unibertsitatean ezartzen zaigun hezkuntza eredua, sistema patriarkatuaren interesetara dagoena, irauli eta hezkidetza gure heziketaren oinarri gisa kokatzea.
Hori dela eta, martxoko hilabetean zehar Euskal Herriko ikastetxe nahiz unibertsitateetan, Hezkidetza Tailerrak gauztuko ditugu. Gure helburua, sitema kapitalista eta patriarkal honek hezkuntzan sisteman duen eskusartzea idetikatzen ikastea izango da, errealitate honen gaineko kontzientzia garatu eta hezkidetzaren gainean formatuta, hezkuntza parekide baten aldeko borrokak garatu eta bestelako gizarte parekide eta askatzaile baten mesedetan eragind ezagun.
Honekin batera, borroka femistarekin bat eginaz, Martxoaren 8a, Emakume Langilearen Nazioarteko Egunerako antolatuta dauden ekimen eta deialdi ezberdinekin bat egiten dugu, eta ikasleriari berauetan parte hartzeko deia luzatzen diogu. Ikalse borrokaz lortuko dugulako.